اسرائیل کا قطر پر حملہ ، افغان حکومت کا سخت رد عمل سامنے آگیا

 افغانستان کی طالبان حکومت نے اسرائیل کی جانب سے قطر میں فضائی حملے پر سخت ردعمل

 کابل(ڈیلی آن لائن)افغانستان کی طالبان حکومت نے اسرائیل کی جانب سے قطر میں فضائی حملے پر سخت ردعمل کا اظہار کیا ہے۔افغان حکومت کے ترجمان ذبیح اللہ مجاہد کی جانب سے جاری بیان کے مطابق دوحہ میں فلسطین کی اسلامی مزاحمتی تنظیم حماس کے دفتر کو  اسرائیل کی جانب سے نشانہ بنایا گیا جس میں متعدد افراد شہید ہوئے جس پر ہم فلسطین اور  شہدا کے اہل خانہ سے دلی تعزیت کرتے ہیں۔

افغان حکومت نے قطر کے خلاف اسرائیلی جارحیت اور حماس کے سیاسی دفتر کو نشانہ بنانے کی شدید مذمت کی اور کہا کہ یہ ایک سفاکانہ عمل سمجھتے ہے جو انسانی اقدار کی خلاف ورزی ہے۔ترجمان نے کہا کہ اسرائیل بار بار اور عالمی انسانی حقوق اور اصولوں کی خلاف ورزی کر رہا ہے اور مسلسل جرائم کا مرتکب ہو رہا، بااثر ممالک اور عالمی ادارے خاموش ہیں، یہ انتہائی افسوسناک ہے۔

ترجمان کا کہنا تھاکہ ہم اسرائیل کی جارحیت اور جنگی جرائم کو فوری طور پر روکنے، ریاستوں کی خودمختاری کے احترام اور فلسطین میں مظلوم مسلمانوں کے خلاف جاری اسرائیلی بربریت کے خاتمے کا مطالبہ کرتے ہیں۔

خیال رہے کہ اسرائیل نے قطر کے دارالحکومت دوحہ پر فضائی حملہ کرکے مقبوضہ فلسطین کی مزاحمتی تنظیم حماس کی مرکزی قیادت کو نشانہ بنایا۔